मेचीनगर, चैत १३ । मेचीनगरको बाहुनडाँगी सिद्धिखोला एकिकृत खानेपानी सरसफाई उपभोक्ता समितिको आगामी चैत १६ गते कार्यसमिति चयनका लागि हुने निर्वाचनमा राजनितिक दलका उम्मेद्वारबीच चुनावी रस्साकस्सी भइरहेको छ ।
दलगत रुपमै उम्मेद्वार मैदानमा छन भने चुनावी प्रचारमा पनि दलिय संलग्नता नै हाबी देखिएको छ । मतदानको दिन नजिकिदैं जाँदा चुनावी प्रचार प्रसारलाई तिब्रता दिएका सबै दलहरुले आफ्ना उम्मेद्वारको पक्षमा नतिजा आउने दाबी गरेका छन ।
नेपाली काँग्रेस, राप्रपा र लिम्बुवानको संयुक्त प्यानल सहित चुनावी मैदानमा होमिएका छन । काँग्रेस नेतृत्वको राप्रपा र लिम्बुवानको समूहबाट काँग्रेसका हेमलाल गुरागाई अध्यक्षका उम्मेद्वार हुनुहुन्छ भने उपाध्यक्षमा काँग्रेसकै सागर कार्की उम्मेद्वार हुनुहुन्छ । त्यसैगरी सचिवमा राप्रपाका सन्तोस सुवेदी, सहसचिवमा राप्रपाकै राजन न्यौपाने र कोषाध्यक्षमा काँग्रेसका पुर्णिमा कट्टेल उम्मेद्वार हुनुहुन्छ । यो समूहबाट दुई जना कार्यसमिति सदस्यमा लिम्बुवानका तर्फबाट उम्मेद्वार रहनु भएको छ ।
बाहुनडाँगी खानेपानी उपभोक्ता समितिको चुनावमा नेकपा एमालेले एकल प्यानल मैदानमा उतारेको छ । एमालेका तर्फबाट अध्यक्षमा पासाङ तामाङ उम्मेद्वार हुनुहुन्छ । तामाङ यस अघि मेचीनगर १ को वडा अध्यक्ष भइसक्नु भएको व्यक्ति हुनुहुन्छ । उहाँले २०७४ को स्थानीय तह निर्वाचनमा एमालेका तर्फबाट मेचीनगर १ को वडा अध्यक्षमा निर्वाचित हुनु भएको थियो ।
त्यस्तै एमालेले उपाध्यक्षमा पुस्कर घिमिरेलाई उम्मेद्वार बनाएको छ भने सचिवमा गोपाल विश्वकर्मा, कोषाध्यक्षमा पुष्पकुमारी घिमिरे बिष्ट र सहसचिवमा सुरेश घिमिरे उम्मेद्वार हुनुहुन्छ । सहसचिवमा उम्मेद्वार रहनु भएका घिमिरे पुर्व वडा सदस्य समेत हुनुहुन्छ ।
त्यसैगरी नेकपा माओवादी केन्द्रले भने अध्यक्षको उम्मेद्वारमात्रै चुनावी मैदानमा उतारेको छ । नेकपा माओवादी केन्द्रले मेघराज खड्कालाई अध्यक्षको उम्मेद्वार बनाएर स्वतन्त्र उम्मेद्वार भनेर प्रचार गरेर राजनितिक दलबाट बिरक्तिएका उपभोक्ताको मत लिने रणनिति बनाएको देखिएको छ । बाहुनडाँगी खानेपानीको चुनावमा राष्ट्रिय स्वतन्त्र पार्टी(रास्वपा)ले पनि सचिव मात्रै चुनावी मैदानमा उतारेको छ । रास्वपाका तर्फबाट सविचमा राजन कार्कीलाई उम्मेद्वार बनाएको छ ।
एक हजार ३ सय २९ जना मतदाता रहेको बाहुनडाँगी खानेपानी उपभोक्ता समितिको मतदान चैत १६ गते विहान ८ बजेदेखि अपरान्ह ४ बजेसम्म मेचीनगर १ मेचेडाँगी स्थीत युनाइटेड बोर्डिङ स्कुलमा सञ्चालन हुने निर्वाचन समितिका संयोजक चन्द्रशेखर गुरागाईले जानकारी दिनुभयो । मतगणना खानेपानीकै कार्यालयमा गरिने संयोजक गुरागाईले बताउनु भयो ।
