झापा, चैत ७ । झापाको भद्रपुरस्थीत मेची बहुमुखी क्याम्पसको स्वतन्त्र विद्यार्थी युनियन (स्ववियु) को अध्यक्षमा नेपाल विद्यार्थी संघकी निलम कार्की विजयी हुनु भएको छ । चैत ५ गते सम्पन्न निर्वाचनको हिजो बेलुका सम्पन्न मतगणनाबाट कार्कीले ८२६ मत प्राप्त गरी विजयी हुनु भएको हो । उहाँका निकटतम प्रतिस्पर्धी अनेरास्ववियुका प्रन्सल मगरले ५४० मत प्राप्त गर्नु भएको छ ।
त्यस्तै सचिवमा नेविसंघकै विवेक तामाङ विजयी हुनु भएको छ । तामाङले ६३३ मत प्राप्त गरी विजयी हुँदा उहाँका निकटतम प्रतिस्पर्धी अनेरास्ववियुका गौरव लुइटेलले ५५२ मत प्राप्त गर्नु भएको छ । त्यस्तै कोषाध्यक्षमा पनि नेविसंघकै प्रतिक रौनियारले ९०९ मत प्राप्त गरी विजयी हुनु भएको छ । उहाँका निकटतम प्रतिस्पर्धी अनेरास्ववियुका अनुसार भण्डारीले ४७२ मत मात्रै प्राप्त गर्नु भएको हो ।
झापाका १३ वटा क्याम्पसमा स्ववियुको निर्वाचन भएको थियो । त्यस मध्ये ९ वटामा नेपाली काँग्रेस सम्बद्ध नेविसंघ विजयी भएको छ भने ३ वटा क्याम्पसमा नेकपा एमाले सम्बद्ध अनेरास्ववियु विजयी भएको छ । त्यस्तै एउटा क्याम्पसमा भने राप्रपा सम्बद्ध राप्रविसंघ विजयी भएको छ ।
नेविसंघले जितेका क्याम्पसहरुमा मेची बहुमुखी क्याम्पस भद्रपुर, काकरभिट्टा बहुमुखी क्याम्पस मेचीनगर, कनकाई आदर्श क्याम्पस बिर्तामोड, इन्द्रचन्द्र क्याम्पस बिर्तामोड, शनिश्चरे बहुमुखी क्याम्पस अर्जुनधारा, गौरादह कृषि क्याम्पस गौरादह, गौरीगञ्ज क्याम्पस गौरीगञ्ज, कनकाई क्याम्पस सुरुङा र दमक बहुमुखी क्याम्पस दमक रहेका छन । अनेरास्ववियुले जितेका क्याम्पसहरुमा त्रिदेव बहुमुखी क्याम्पस मेचीनगर, सितारमेश बहुमुखी क्याम्पस बुद्धशान्ति र गौरादह क्याम्पस गौरादह रहेका छन भने बिर्तामोडको गरामनी क्याम्पसमा राप्रविसंघले जितेको छ ।
