झापा, चैत ५ । झापाकाे काकरभिट्टा क्याम्पसका ४५ जना विद्यार्थीलाई आज सम्पन्न स्वतन्त्र विद्यार्थी युनियन(स्ववियु) निर्वाचनमा मतदानबाट बञ्चित गरिएकाे छ ।
मतदाता नामावलीमा नाम समावेश भएका विद्यार्थीलाई नै मतदान गर्न दिइएन । मतदाता नामावलीमा ३२४ जनाकाे नाम भए पनि त्यसमध्ये ४५ जना विद्यार्थीलाई मतदान सुरू हुन अघि नै मतदान गर्न नपाउने निर्वाचन समितिले घाेषणा गरेकाे थियाे ।
त्रिविकाे स्ववियु निर्वाचन निर्देशिकामा मतदाताले क्याम्पसकाे परिचय पत्र अनिवार्य गरेकाले परिचय पत्र नबनाएका विद्यार्थीले मतदान गर्न नपाउने व्यवस्था गरेकाले त्यस्ता विद्यार्थीलाई मतदान गर्न नदिएकाे काकरभिट्टा क्याम्पसका निर्वाचन अधिकृत हेमकुमार खड्काले बताउनु भयाे । `मतदातामा नाम भएका र क्याम्पसकाे परिचय पत्र बाेकेर आउनेलाई मात्रै मतदानमा सहभागि गराएका हाैं,´ खड्काले भन्नुभयाे, `विद्यार्थीलाई परिचय पत्र दिने कि नदिने भन्ने विषय क्याम्पस प्रशासनकाे हाे ।´
फागुन २९ गतेसम्म परिचय पत्र बनाउने समय ताेकिएकाे र साे अवधीमा परिचय पत्र नबनाउनेले मतदान गर्न नपाएकाे क्याम्पस प्रमुख लक्ष्मीप्रसाद उप्रेतीले बताउनु भयाे । `परिचय पत्र बनाउन क्याम्पसले पटक पटक सूचना जारी गरेकाे हाे,´ उप्रेतीले भन्नुभयाे, `क्याम्पसमा भर्ना भएका विद्यार्थी ३२४ हुन ती मध्ये ४५ जनाले परिचय पत्र बनाएनन ।´
त्रिदेव क्याम्पस चारआलीमा मतदानकै दिन आज विद्यार्थीलाई परिचय पत्र जारी गर्दै ।
मेचीनगर-६ काे काकरभिट्टा क्याम्पसले परिचय पत्र नभएर विद्यार्थीलाई मतदानबाट बञ्चित गरे पनि मेचीनगर कै वडा न १३ मा रहेका त्रिदेव क्याम्पसले भने परिचय पत्र नभएका तर मतदाता नामावलीमा नाम समावेश भएका विद्यार्थीका लागि आज मतदानकाे दिन पनि क्याम्पस प्रशासनले परिचय पत्र जारी गरेर मतदान प्रक्रियामा समावेश गराएकाे छ ।
त्रिविकाे निर्वाचन निर्देशिकाले मतदान गर्न क्याम्पसकाे परिचय पत्र चाहिने भने पनि उक्त परिचय पत्र विद्यार्थीले कहिलेसम्म लिईसक्नु पर्ने भन्ने उल्लेख छैन ।
