झापा, चैत ५ । स्वतन्त्र विद्यार्थी युनियन(स्ववियु) काे निर्वाचन आज हुदैछ । त्रिभुवन विश्वविद्यालयका आंगिक र सम्बन्धन प्राप्त देशभरका क्याम्पसमा स्ववियुको नेतृत्व चयनका लागि आज मतदान हुँदैछ । बिहान ८ बजेदेखि दिउँसो ४ बजेसम्म मतदानकाे समय तोकिएको छ ।
झापाका पनि मेची क्याम्पस भद्रपुर, दमक क्याम्पस, कन्काई क्याम्पस सुरूङ्गा, त्रिदेव क्याम्पस चारआली, काकरभिट्टा क्याम्पस, कन्काई क्याम्पस बिर्तामाेड, इन्द्रचन्द्र क्याम्पस बिर्तामाेड, सितारमेश क्याम्पस बुधबारे लगायतका क्याम्पसमा स्ववियुकाे नेतृत्व चयनका लागि आज मतदान हुदैछ ।
अध्यक्ष, सचिव, कोषाध्यक्ष र केही सदस्य प्रत्यक्ष तथा उपाध्यक्ष, सहसचिवलगायत केही सदस्य समानुपातिक निर्वाचन प्रणालीअनुसार निर्वाचित हुनेछन् । निर्वाचन निर्देशिकामा क्याम्पसमा रहेका विद्यार्थी संख्याका आधारमा स्ववियु कार्यसमिति निर्वाचित हुने व्यवस्था छ । दुई सयसम्म विद्यार्थी रहेको क्याम्पसमा ११, दुई सयदेखि हजारसम्म विद्यार्थी रहेकामा १५, एक हजारदेखि तीन हजारसम्म भए १९ र त्यसभन्दा बढी विद्यार्थी संख्या रहेको क्याम्पसमा २१ सदस्यीय स्ववियु कार्यसमिति रहनेछ ।
स्ववियु कार्यसमितिको कार्यकाल दुई वर्षको हुनेछ । २०७३ सालदेखि मिश्रित प्रणालीमा आधारित निर्वाचनको थालनी भएको हो भने उम्मेदवारको उमेरहद २८ वर्ष कायम गरिएको छ ।
