झापा, फागुन १६ । नेपाली काँग्रेसका महामन्त्री विश्वप्रकाश शर्माले सरकारले कुलमान घिसिङलाई हटाउन खोज्नु गलत भएको बताउनु भएको छ । बिहिबार प्रेस क्लव मेचीनगरको पद हस्तान्तरण कार्यक्रममा बोल्दै प्रतिनिधि सभा सदस्य समेत रहनु भएका शर्माले कर्मको पछि लाग्नु पर्ने सरकार कर्मचारीको पछि लागेको छ । ’सरकारका कर्मको पछि नलागेर कर्मचारीको पछि लाग्यो,’ महामन्त्री शर्माले भन्नुभयो, ‘विद्युत प्रधिकरणका कार्यकारी निर्देशक कुलमान घिसिङलाई हटाउने सरकारले गरिरहेको काम गलत छ ।’
घिसिङले गल्ती गरेकै भए पनि सेवा अवधि पछि पनि छानविन गरेर कारबाही गर्न कानूनले नछेक्ने भएकाले अहिले हटाउन नहुने शर्माले बताउनु भयो । ‘वहाँले गल्ती गरेकै छ भने पनि कार्यकाल सकिए पछि पनि अनुसन्धान गरी कारबाही गर्न कानूनले रोक्दैन,’ शर्माले भन्नुभयो, ‘केही महिना मात्रै सेवा अवधी बाँकी रहेको अवस्थामा प्रधिकरणको कार्यकारी निर्देशक हटाउनु गलत हुन्छ ।’
नेपाली काँग्रेसकै नेता दिपक खड्का उर्जा मन्त्री भएको र मन्त्री र घिसिङबीचको विवाद सतहमै आएका बेला काँग्रेस महामन्त्री शर्मा घिसिङको पक्षमा देखिनु भएको छ । कार्यक्रममा बोल्दै शर्माले संसदमा दर्ता भएको सामाजिक सञ्जाल विद्येयक जस्ताको तेस्तै पारित नहुने कुरा दोहोर्याउनु भएको छ । ‘प्रधानमन्त्रीकै जिल्लाबाट वहाँलाई सन्देश दिन्छु की सामाजिक सञ्जाल विद्येयकका बारेमा सरकार संशोधन गर्ने प्रक्रियामा तयार होस,’ शर्माले भन्नुभयो, ‘बोल्न पाउने, विरोध गर्न पाउने व्यवस्थाका लागि यो व्यवस्था ल्याएको हो ।’
प्रेस क्लव मेचीनगरका पुर्व अध्यक्ष तथा निर्वाचन समिति संयोजक ज्ञानेन्द्र निरौलाको अध्यक्षतामा सम्पन्न पद हस्तान्तरण कार्यक्रममा मेचीनगरका प्रमुख गोपालचन्द्र बुढाथोकीले नगरको विकासका लागि स्थानीय सञ्चारकर्मीहरुले सकरात्मक सहयोग गर्न आग्रह गर्नु भयो । कार्यक्रममा पत्रकार महासंघ कोशी प्रदेशकी उपाध्यक्ष अम्बिका भण्डारी, क्लवका संस्थापक अध्यक्ष सन्तोस आचार्य, पुर्व अध्यक्ष मुक्ति पौडेल, निवर्तमान अध्यक्ष डम्बर बराल, नेपाली काँग्रेसका क्षेत्रीय सभापति इन्द्रबहादुर बुढाथोकी र चारआली खानेपानी उपभोक्ता समितिका अध्यक्ष राजन चिमरियाले शुभकामना मन्तव्य राख्नु भएको थियो भने नवनिर्वाचित अध्यक्ष प्रकाश पौडेलले भावी योजना सहितको प्रतिबद्धता मन्तव्य राख्नु भएको थियो । कार्यक्रम प्रेस क्लवका सदस्य तथा निर्वाचन समिति सदस्य प्रकाश उप्रेतीको सञ्चालनमा सम्पन्न भएको थियो ।
