भद्रपुर, फागुन १४ । भद्रपुर झापा गाेल्डकपकाे उपाधी भिडन्त दुई झापाली टिमबीच हुने निश्चीत भएकाे छ । झापाकाे चन्द्रगढीस्थीत मेची रंगशालामा जारी भद्रपुर झापा गाेल्डकपकाे फागुन १६ गते हुने फाईनलमा दुइ झापाली टिम झापा ११ र आयाेजक भद्रपुर ब्लेजर्सबीच प्रतिस्पर्धा हुने भएकाे छ ।
बुधबार भएको अन्तिम सेमिफाइनल खेलमा झापा ११ ले विदेशी टोली भुटानको डागा युनाइटेड एफसीलाई ३–१ गोल अन्तरले हराउँदै उपाधिनजिक पुगेको हो । ९० मिनेटसम्म १–१ को बराबरीमा रहेको खेल इन्ज्युरी समयमा ३–१ अन्तरमा पुगेको थियो ।
यसअघी मंगलवार भएकाे पहिलाे सेमिफाईनलमा भद्रपुर ब्लेजर्सले बिदेशी टिम काउर्न बाजार प्रगति संघ बंगलादेशलाई टाइब्रेकरमा ४-३ हराउँदै फाइनलमा पुगेको थियाे ।
सौर्य एअर ओमसाई पाथिभरा हस्पिटल गम्भीर राई स्मृति संस्करण अन्तर्राष्ट्रिय आमन्त्रण नकआउट फुटबल प्रतियोगिताअन्तर्गत फाइनल खेल फागुन १६ गते हुने गोल्डकपका सचिव तीर्थराज ढकालले जानकारी दिए ।
गोल्डकपको विजेताले नगद १३ लाख, आकर्षक ट्रफी र मेडल र उपविजेताले नगद ७ लाख, ट्रफी र मेडल प्राप्त गर्ने अध्यक्ष दिपेश ढकालले बताए । प्रतियोगिताभरिको सर्वोत्कृष्ट खेलाडी प्लेयर अफ द टुर्नामेन्टले नगद एक लाख पाँच हजार रुपैयाँ पाउनेछ । त्यस्तै, उत्कृष्ट गोलकिपर, उच्च गोलकर्ता, उदीयमान खेलाडी र प्रशिक्षकले नगद २५ हजार पाउने महासचिव जीवनकुमार श्रेष्ठले बताए । प्रत्येक खेलको प्लेयर अफ द म्याचलाई नगद २१ हजार रुपैयाँ दिइनेछ ।
बुधवार खेलमा एकजना दर्शकले महेन्द्ररत्न स्टोर बिर्तामोडका तर्फबाट एक थान हिमस्टार टिभी, एयरपोर्ट होटलका तर्फबाट एकजना दर्शकले दुईजनाको डिनर र सुनचाँदी व्यवसायी संघ भद्रपुर शाखाको तर्फबाट दुईवटा चाँदीको सिक्का पाए ।
