मेचीनगर, फागुन १२ । महाशिवरात्री पर्वको अवसरमा झापाको प्रसिद्ध धार्मिक तथा पर्यटकीय क्षेत्र पतालगंगा तथा नन्देश्वर मन्दिर परिषरमा तीन दिने धार्मिक अनुष्ठान सहितका कार्यक्रम सञ्चालन हुने भएको छ । मेचीनगरको वडा नं. ५र ८ मा पर्ने उक्त धार्मिक पर्यटकीय क्षेत्रमा फागुन १३, १४ र १५ गते बृहत धार्मिक महोत्सव सम्पन्न गर्न लागिएको सुरेन्द्रनगर घैलाडुब्बा देवी तथा शिवालय मन्दीर संरक्षण समितिका अध्यक्ष गणेशकुमार खरेलले बताउनु भयो । वहाँका अनुसार भगवान शिवको महिमा कथा वाचन, धार्मिक प्रवचन, भजन किर्तन , शिव आरधना तथा पुजापाठ र हवन आयोजना गरिएको छ ।
महाशिवरात्री पर्वको अवसरमा मन्दीर परिषरमा धार्मिक मेला समेत आयोजना गरिएको अध्यक्ष खरेलले बताउनु भयो । ‘मन्दीर परिषरमा श्रृंगार लगायतका सामग्री र शुद्ध साहाकारी भोजनको सामग्रीहरु राखेर धार्मिक मेला लगाउने तयारी गरेका छौं,’ अध्यक्ष खरेलले भन्नुभयो, ‘यो क्षेत्रको धार्मिक र पर्यटकीय महत्व उजागर गर्ने प्रयास गरिरहेका छौं ।’
उक्त अवसरमा मनोरञ्जनका सामग्री सहितको सामग्री भने मन्दीर परिषरभन्दा केही टाढा मात्रै राखिने योजना रहेको अध्यक्ष खरेलले सुनाउनु भयो । ‘मन्दीर परिषरमा मनोरञ्जन र मासुजन्य सामग्री बिक्रि गर्न निषेश गरेका छौं,’ अध्यक्ष खरेलले भन्नुभयो, ‘त्यस्ता सामग्री मन्दीरभन्दा टाढा खोला पारी मात्रै राख्न दिन्छौं ।’
बिगतमा महाशिवरात्रीका बेला मुख्य सडक क्षेत्र अत्यन्तै अव्यवस्थीत हुने भएकाले यो बर्षको मेलामा मुख्य सडक क्षेत्रमा कुनै पनि व्यवशायीक गतिविधि गर्न प्रतिबन्ध लगाइएकाले सडकमा आवागमन सहज हुने अध्यक्ष खरेलले जानकारी दिनुभयो । महाशिवरात्री पर्वको महान अवसरमा सबै धर्मानूरागी महानुभावहरुलाई पतालगंगा तथा शिवालय मन्दीर परिषरमा लाग्ने धार्मिक महोत्सवको अवालोकन गरिदिन मन्दीर संरक्षण समितिले आग्रह समेत गरेको छ ।
