मेचीनगर, फागुन १२ । पुर्वोत्तर झापाको बाहुनडाँगी क्षेत्र बिगतमा खानेपानीको अभावका कारण समस्यामा थियो । तर अहिले बाहुनडाँगी क्षेत्र खानेपानीमा आत्मर्भिर भएको छ । मेचीनगर नगरपालिका वडा नं. १, २ र ४ को क्षेत्रमा मात्रै एउटै खानेपानी उपभोक्त समिति मार्फत पछिल्लो १३ बर्षमा करीब २४ करोड राज्यले लगानी गरिसकेको बाहुनडाँगी सिद्धिखोला एकिकृत खानेपानी उपभोक्ता तथा सरसफाई संस्थाका अध्यक्ष सनत अधिकारीले जानकारी दिनुभयो ।
शुरुमा करीब ४ सय धारा जडान गरेको भए पनि २६४ वटा धारामा मात्रै पानी आउने अवस्थाबाट अहिले एक हजार दुई सय ७० वटा धारामा नियमित पानी आउने बनाएको अध्यक्ष अधिकारीले बताउनु भयो । वहाँका अनुसार अबको केही समय पछि नै करीब तीन हजार पाँचसय धारा जडान गरेर पानी दिन सक्ने अवस्थामा हुन्छ ।
मेचीनगर १ स्थीत अहिले सञ्चालनमा रहेको खानेपानी संस्थाको मुख्य टेंकी भएको क्षेत्रमा रहेको पानी प्रशोधन केन्द्र ।
‘नयाँ योजना सम्पन्न भइसकेका छन,’ अध्यक्ष अधिकारीले भन्नुभयो, ‘केही दिनमा नयाँ योजना सञ्चालनमा आउँछ, त्यसपछि बाहुनडाँगीमा खानेपानी पर्याप्त हुन्छ ।’ वहाँका अनुसार संघीय खानेपानी तथा ढल व्यवस्थापन आयोजनाबाट १८ करोड भन्दा बढीको योजना सम्पन्न भएको छ । त्यो आयोजना सञ्चालनको अन्तिम चरणमा रहेकाले पनि अब बाहुनडाँगीमा खानेपानीको अभाव नहुने अध्यक्ष अधिकारीले बताउनु भयो ।
आर्थिक बर्ष २०६९/०७० देखि चालु आर्थिक बर्षसम्म २३ करोड ८५ लाख ८८ हजार ३३० रुपैयाँ सरकारको विभिन्न कार्यालयबाट फरक फरक परियोजनाका लागि संस्थामा आएको र खानेपानीका लागि पुर्वाधार लगायतका काममा खर्च भएको अध्यक्ष अधिकारीले बताउनु भयो । ‘हामीले सबै आयव्यय विवरण चुस्त दुरुस्त राखेका छौं,’ अधिकारीले भन्नुभयो, ‘जुनसुकै बेला हाम्रो संस्थामा सञ्चालन भएको आयोजना र खर्चको विवरण हेर्न मिल्छ ।’
नयाँ आयोजनामार्फत सम्पन्न भएर सञ्चालनको तयारीमा रहेको फिल्टर सहितको खानेपानीको टेंकी ।
साबिकको बाहुनडाँगी गाविस क्षेत्र पुरैलाई पानी खुवाउन सक्ने अवस्था बनेको बाहुनडाँगी सिद्धिखोला एकिकृत खानेपानी उपभोक्ता तथा सरसफाई संस्थाका उपाध्यक्ष मेघराज खड्काले बताउनु भयो । ‘बाहुनडाँगी क्षेत्रमा अब खानेपानीको समस्या हुँदैन,’ खड्काले भन्नुभयो, ‘अहिले एउटा ठुलो आयोजना सम्पन्न हुने क्रममा छ त्यो सम्पन्न भएसंगै पानी पर्याप्त हुन्छ ।’
निर्माणधिन अवस्थामा रहेको पानी प्रशोधन केन्द्र ।
राज्यका सबै तहको सहयोगमा खानेपानीका लागि बजेट व्यवस्थापन भएको संस्थाका सहसचिव महेन्द्र मल्लको भनाई छ । ‘हाम्रो समितिलाई सबैले सहयोग गरेर नै ठुला परियोजना पनि सम्पन्न गर्न सफल भएका छौं,’ मल्लले भन्नुभयो ।
अहिले पनि मासिक एक सय रुपैयामा २० हजार लिटर पानी उपभोक्तालाई उपलब्ध गराई रहेको बाहुनडाँगी सिद्धिखोला एकिकृत खानेपानी उपभोक्ता तथा सरसफाई संस्थामा सनत अधिकारी नेतृत्वको समितिले नै बिगत १३ बर्षदेखि निरन्तरता पाएको छ भने समितिको पछिल्लो कार्यकाल समाप्त हुन लागेको छ ।
