धुलाबारी, फागुन १० । झापाको मेचीनगर १० स्थीत महालक्ष्मी कृषि सहकारी संस्थाले एउटा कार्यक्रमका अतिथिहरुलाई मायोको चिनोका रुपमा परालको पिरा दिएको छ । संस्थाले आयोजना गरेको महिलाहरुका लागि सिप विकास तालिमको समापन समारोहका अतिथिहरुलाई संस्थाकी अध्यक्ष टिका सुवेदीले परालको पिरा उपहार दिदैं गर्दा कार्यक्रमको माहोल नै उल्लासमय बनेको थियो ।
कार्यक्रमका प्रमुख अतिथि मेचीनगर वडा नं. १० का वडा अध्यक्ष नारायण खनाल, अतिथिहरु मेचीनगर नगरपालिकाका आर्थिक विकास शाखा प्रमुख दिपेन्द्र कार्की, पुर्वीद्वार बचत तथा ऋण सहकारी संस्थाका अध्यक्ष बिपी भट्टराई, पत्रकार ज्ञानेन्द्र निरौला लगायतलाई अध्यक्ष सुवेदीले तालिममै सिकेर महिलाहरुले बनाएको परालको पिरा, अर्गानिक धुपबाती, मकैको खोसेलाबाट बनेको फुल लगायतका सामग्री मायाको चिनोको रुपमा प्रदान गर्नु भएको थियो । त्यति मात्रै होईन कार्यक्रममा अतिथिहरुका लागि तयार पारेको व्याज पनि सोही तालिममा सिकेको मकैको खोसेलाबाट बनाइएको थियो ।
मेचीनगर १० वडा कार्यालयको आर्थिक सहयोगमा सञ्चालित १० दिने स्थानीय महिलाहरुका लागि सिप विकास तालिममा सहभागि महिलाहरुले मकैको खोसेलाको फुल र ब्याज, परालको पिरा, परालको गुन्द्री, परालकै बिणा, अर्गानिक धुफ कागजको थुगा,मकैको खोयाको माला, परालको जुत्ता लगायतका सामग्री बनाउन सिकेका थिए । माघ २९ गतेदेखि सञ्चालन भएको तालिममा ५० जना स्थानीय महिलाहरुको सहभागिता रहेको थियो भने महिला उद्यमी निर्मला चौहान भण्डारीले प्रशिक्षकको भुमिका निर्वाह गर्नु भएको थियो ।
महालक्ष्मी कृषि सहकारी संस्थाकी अध्यक्ष टिका सुवेदीको सभापतित्वमा सम्पन्न तालिम समापन समारोहमा प्रमुख अतिथि वडा अध्यक्ष खनालले सिप सिकेर त्यसको प्रयोग नगर्नेहरु भ्रष्टचारी भएको बताउनु भएको थियो । वहाँले महिलाहरुले सामग्री उत्पादन गर्दा वडा कार्यालयले बजारीकरणमा सहयोग गर्ने प्रतिबद्धता व्यक्त गर्नु भएको थियो ।
कार्यक्रममा बोल्दै नगरपालिकाका आर्थिक विकास शाखा प्रमुख कार्की, पुर्वीद्वार सहकारी संस्थाका अध्यक्ष भट्टराई, सहकारीकी निवर्तमान अध्यक्ष दुर्गा खतिवडा, प्रशिक्षक चौहान, पत्रकार निरौला लगायतले सिकेको सिपलाई प्रयोग गरी त्यसलाई बजारमा पुर्याउन सुझाव दिनु भएको थियो ।
जनजागृति हरिकिर्तन भजन मण्डलीको सभाहलमा सम्पन्न तालिम समापन समारोहमा कार्यक्रम संयोजक पद्मा भट्टराईले स्वागत मन्तव्य व्यक्त गर्नु भएको थियो भने संस्थाकी व्यवस्थापक प्रेमकुमारी सुवेदीको सञ्चालनमा कार्यक्रम सम्पन्न भएको थियो ।
