चन्द्रगढी, फागुन ९ । झापाको चन्द्रगढीमा जारी भद्रपुर झापा गोल्डकपमा आयोजक भद्रपुर ब्लेजर्स सेमिफाइनल पुग्ने पहिलो टिम भएको छ । शुक्रबार सम्पन्न क्वाटरफाइनलमा भद्रपुरले विभागीय टोली नेपाल पुलिस क्लबलाई २–१ गोल अन्तरले पराजित गर्दै सेमिफाइनलमा प्रवेश गरेको हो । पहिलो हाफमा गोलरहित बराबरी खेलको भद्रपुरले दोस्रो हाफमा दुई गोल लगायो ।
खेलको ७२ ओै मिनेटमा मिलन राईले गोल गर्दै टिमलाई अग्रता दिलाए । आशिष चापागाईंले पेनाल्टी एरिया नजिकैबाट दिएको पासमा राईले गोल गरे । खेलको ७४ ओै मिनेटमा भद्रपुरले पेनाल्टीमा एक गोल थप्दै खेलमा २–० को अग्रता बनायो । आशिष चापागाईंलाई पुलिसका मानबहादुर परियारले पेनाल्टी एरियामा फाउल गरेपछि पाएको पेनाल्टी सुटको अवसरलाई मिलन राईले गोलमा परिणत गरेर अग्रता फराकिलो बनाए । दोस्रो हाफको अतिरिक्त समयमा पुलिसले एक गोल फर्कायो । भद्रपुरका किपर जियारत शेख चुकेपछि प्रशान्त कुवरले गोल गरे ।
भद्रपुरले खेलमा केही अवसरहरू गुमायो । खेलको ४० ओै मिनेटमा पेनाल्टी एरियाबाट मिलन राईले प्रहार गरेको बल फस्ट वारमा लागेर फर्किए । खेलको ४५ ओै पुलिसका गोलकिपर अमित टमाटा बिट भएपछि मिलन राईको प्रहार गोल लाईनमा पुलिसका हेमन्त श्रेष्ठले उत्कृष्ट बचाउ गरे । खेलको अतिरिक्त समयमा विदेशी खेलाडी फोडे फोफोनाले पेनाल्टी एरियाबाट प्रहार गरेको बल पुलिसका किपर टमाटाले रोके । खेलको ५४ ओै मिनेटमा पुलिसका अनुप लिम्बूको हेडर भद्रपुरका किपर शेखले पञ्च गरे । कृष्ण गुरूङको क्रस पासमा पेनाल्टी एरियाबाट लिम्बूले हेड गरेका थिए । शुक्रबारको खेलमा प्लेयर अफ द म्याच विजेता टोलीका मिलन राई घोषित भए । उनले नगद २१ हजारसहित ट्रफी पाए ।
खेल पछि भएको पोष्ट म्याच कन्फ्रेन्समा भद्रपुरका सहायक प्रशिक्षक अर्जुन राईले पहिलो हाफ गोलरहित बराबरीमा टुंगिएपछि दोस्रो हाफमा रणनीति बनाएर पुलिसमाथि जित दर्ता गरेको बताए । पुलिसको प्रर्दशन पनि राम्रो थियो । घरेलु टिम र दर्शकका साथका कारण खेलाडीले राम्रो प्रर्दशन गरेको उनको भनाइ छ । उता पुलिसका प्रशिक्षक सुमन सुवेदीले खेलाडीहरूले राम्रो प्रर्दशन गरेपनि डिफेन्समा चुक्दा हार बेहोर्नु परेको बताए । हामी जित्ने योजनाका साथ मैदानमा उत्रिए पनि सानो गल्तीले चुकेको उनको भनाई छ ।
शनिबारको दोस्रो क्वाटरफाइनल खेल झापा ११ एफसी र चर्च ब्वाईच युनाइटेडबीच हुनेछ । मछिन्द्रलाई हराउँदै झापा क्वाटरफाइनलमा प्रवेश गरेको थियो । मोफसलकै प्रतिष्ठित र लोकप्रिय प्रतियोगिता मानिएको भद्रपुर झापा गोल्डकपको मुख्य प्रायोजक सौर्य एयरलाइन्स तथा ओम साई पाथीभरा हस्पिटल भद्रपुर रहेका छन । भद्रपुर नगरपालिका संरक्षक र झापा जिल्ला खेलकुद विकास समिति समन्वयकर्ताको रुपमा रहेका छन ।
गम्भीर राई स्मृति संस्करणका रुपमा सञ्चालन भएको गोल्डकपको विजेताले नगद १३ लाख, आकर्षक ट्रफी र मेडल र उपविजेताले नगद ७ लाख, ट्रफी र मेडल प्राप्त गर्नेछ। गोल्डकप सम्पन्न गर्न एक करोड ७८ लाख रुपैयाँ खर्च लाग्ने अनुमान गरिएको छ। प्रतियोगिताभरिको सर्वोत्कृष्ट खेलाडी प्लेयर अफ द टुर्नामेन्टले नगद एक लाख पाँच हजार रुपैयाँ पाउनेछ । त्यस्तै, उत्कृष्ट गोलकिपर, उच्च गोलकर्ता, उदीयमान खेलाडी र प्रशिक्षकले नगद २५ हजार पाउनेछ ।
आज खेलमा एकजना दर्शकले महेन्द्ररत्न स्टोर बिर्तामोडका तर्फबाट एक थान हिमस्टार टिभी, एयरपोर्ट होटलका तर्फबाट एकजना दर्शकले दुईजनाको डिनर र सुनचाँदी व्यवसायी संघ भद्रपुर शाखाको तर्फबाट दुईवटा चाँदीको सिक्का पाए ।
