झापा, फागुन ६ । भद्रपुर झापा गोल्डकप बुधबारदेखि सूरु हुँदैछ । सौर्य एयरलाईनस र ओमसाई पाथिभरा हस्पिटल मुख्य प्रायोजक रहेको प्रतियोगिता पुर्व फुटबल खेलाडी गम्भीर राई स्मृति संस्कणका रुपमा आयोजना गरिएको आयोजक समितिका अध्यक्ष दिपेश ढकालले बताउनु भयो ।
प्रतियोगिताका लागि चन्द्रगढीस्थीत मेची रंगशालामा तयारी पुरा गरिएको छ भने अन्य सबै प्रकारका तयारीहरु पुरा भएको अध्यक्ष ढकालले बताउनु भयो । गोल्डकपलाई भब्य बनाउन खेल मैदानलाई निक्कै मेहनत गरेर तयार गरिएको छ भने मैदानको परिषर आकर्षक रुपमा सिङ्गारिएको छ । स्थायी प्याराफिट र बाँसबाट बनाईको अस्थाई गरी करीब २० हजार दर्शक बस्न मिल्ने गरी प्यारापिट निर्माण गरिएको छ ।
गोल्डकपको यो संस्करणका लागि आयोजक टिम भद्रपुर ब्लेजर्स सहित ‘ए’ डिभिजन क्लब चर्च ब्वाइज युनाइटेड, मछिन्द्र फुटबल क्लब, नेपाल पुलिस क्लब, न्यु रोड टिम, सशस्त्र प्रहरीको एपिएफ एफसी र झापा ११ एफसी सहभागी हुनेछन । त्यस्तै गोल्डकपमा विदेशी टिमहरु दार्जिलिङ पुलिस एफसी भारत, ट्रान्सपोर्ट युनाइटेड एफसी भुटान, काउर्न बाजार प्रगति संघ बंगलादेश सहित १० टिम सहभागी हुने आयोजकले जनाएको छ । बुधबार हुने उदघाटन खेलमा आयोजक भद्रपुर ब्लेजर्स र भारतको दार्जिलिङ पुलिस फुटबल क्लबबीच खेल हुने आयोजकले बताएको छ ।
फागुन १६ गते फाइनल प्रतिस्पर्धा हुने गोल्डकपको विजेताले नगद १३ लाख, ट्रफि र मेडल प्राप्त गर्नेछ भने उपविजेताले नगद ७ लाख, ट्रफी र मेडल प्राप्त गर्नेछ । एक करोड ७८ लाख रुपैयाँ खर्च लाग्ने अनुमान गरिएको गोल्डकपको उत्कृष्ट खेलाडीले नगद एक लाख पाँच हजार रुपैयाँ पाउने छ । त्यस्तै उत्कृष्ट गोलकिपर, उच्च गोलकर्ता, उदयीमान खेलाडी र उत्कृष्ट प्रशिक्षकले नगद २५ हजारका दरले पाउने छन भने हरेक दिनको प्लेयर अफ दि म्याच हुने खेलाडीले नगद २१ हजार पाउने आयोजकले जनाएको छ ।
भद्रपुर नगरपालिका संरक्षक रहेको गोल्डकपको उदघाटनमा पुर्वउपप्रधानमन्त्री तथा हाल नेपाली काँग्रेसका राष्ट्रिय सभामा दलका नेता कृष्णप्रसाद सिटौलाको प्रमुख आतिथ्यता रहने अध्यक्ष ढकालले जानकारी दिनुभयो ।
