काकरभिट्टा, फागुन ३ । फागुन २१ गतेदेखि सूरु हुने पाँचौ संस्करणको मेचीनगर गोल्डकपको लोगो आज सार्वजनिक गरिएको छ । काकरभिट्टास्थीत खानेपानी उपभोक्ता समितिको सभाहलमा आयोजित कार्यक्रमकाबीच मेचीनगर प्रमुख गोपालचन्द्र बुढाथोकीले हात्तीको मस्कट रहेको गोल्डकपको लोगो सार्वजनिक गर्नु भयो ।
गोल्डकप मुल आयोजक समितिका संयोजक श्रीप्रसाद मैनालीको सभापतित्वमा सम्पन्न कार्यक्रममा मुल आयोजक समितिका सहसंयोजक तथा आर्थिक समितिका संयोजक विमल आचार्य, समितिका कोषाध्यक्ष गंगालाल गुरुङ, जिल्ला फुटबल संघ झापाका अध्यक्ष भगिरथ आले लगायतले गोल्डकपको तयारीका बारेमा जानकारी गराउनु भएको थियो ।
फागुन २८ गतेसम्म सञ्चालन हुने गोल्डकप सम्पन्न गर्न करीब ८० लाख रकम खर्च हुने आर्थिक समितिका संयोजक आचार्यले बताउनु भयो । मेचीनगर नगरपालिकालाई २५ लाख रकम आयोजक समितिले प्रस्ताव गरेको र त्यसमा नगरपालिकाले निर्णय गरिनसकेको नगरप्रमुख बुढाथोकीले बताउनु भयो ।
गोल्डकप सम्पन्न गर्न दश हजार शुल्क लिएर आजिवन सदस्य बनाउन शुरु गरिएको कोषाध्यक्ष गुरुङले बताउनु भयो । वहाँका अनुसार अहिलेसम्म ३२१ जनाले आजिवन सदस्य बन्न इच्छा देखाएको र केही सदस्य बनिसक्नु भएको छ । कोषाध्यक्ष गुरुङका अनुसार प्रतियोगिताको मुख्य प्रायोजकबाट १५ लाख रकम लिने र एक भन्दा बढी सहप्रयोजकलाई ३ लाख रकम लिने निर्णय भएको छ ।
जिल्ला फुटबल संघका अध्यक्ष आलेले अहिले सबै तिर फुटबल प्रतियोगिता आयोजना भइरहेकाले सबै तिर एकै खाले टिम हुँदा प्रतियोगिताको गुणस्तरमा कमी आउन सक्ने प्रति चिन्ता व्यक्त गर्नु भयो । वहाँले मेचीनगर गोल्डकपलाई बैशाखमा गर्न आयोजकलाई सुझाव समेत राख्नु भयो ।
नेपाल र भारतका गरी आठ टिम सहभागि हुने मेचीनगर गोल्डकपको लाेगाे सार्वजनिक कार्यक्रममा काकरभिट्टा ट्रेनिङ सेन्टरका अध्यक्ष नवराज ओलीले स्वागत मन्तव्य गर्नु भएको थियो भने सचिव राजु कार्कीको सञ्चालनमा कार्यक्रम सम्पन्न भएको थियो ।
