अन्तराष्ट्रिय नाट्य महोत्सवमा नेपालको प्रतिनिधित्व परिवर्तन थिएटरले गर्ने

कला/साहित्य

गृहपृष्ठ
कला/साहित्य

अन्तराष्ट्रिय नाट्य महोत्सवमा नेपालको प्रतिनिधित्व परिवर्तन थिएटरले गर्ने

सेतोपत्र डेस्क बिहीबार, माघ १०, २०८१

पत्रकार सम्मेलनमा अन्तराष्ट्रिय नाट्य महोत्सवमा सहभागिता बारे जानकारी दिंदै परिवर्तन थिएटरका अध्यक्ष नेपालसहितका कलाकारहरु ।

काकरभिट्टा, माघ १० । झापाको काकरभिट्टामा रहेको परिवर्तन थिएटरले भारतमा हुने अन्तराष्ट्रिय नाट्य महोत्सवमा नेपालको प्रतिनिधित्व गर्ने भएको छ । भारतको राजेस्थानस्थीत अलवरमा हुने एक सय दिने अन्तराष्ट्रिय नाट्य महोत्सवमा परिवर्तन थिएटर समेत नाटक मञ्चन गर्ने भएको हो । नाट्य महोत्सवमा सहभागिताका बारेमा जानकारी गराउने उद्देश्यले बिहिबार आयोजित पत्रकार सम्मेलनमा परिवर्तन थिएटरकी अध्यक्ष तथा रंगकर्मी कविता नेपालले अन्तराष्ट्रिय नाट्य महोत्सवमा “त्यो फेरि फर्कला” नाटक मञ्चन गर्ने बताउनु भयो । ‘नेपाली संस्कृति देखाउने उद्देश्यले भवानी भिक्षुको नाटक “त्यो फेरि फर्कला” मञ्चन गर्छौ,’ ‘अध्यक्ष नेपालले भन्नुभयो,’ ‘परिवर्तन थिएटरबाट ११ जना कलाकारहरु सहभागि हुँदैछौं ।’

विश्व समुदायका नाट्यकर्मीका अगाडी हामीले नाटक मञ्चन गर्न पाउने कुराले उत्साहित भएको थिएटरकी कलाकार दिक्षा मरासिनीले बताउनु भयो । त्यस्तै अर्की कलाकार भावना गौतमले राम्रो प्रस्तुतिका लागि अहिले दैनिक अभ्यास गरिरहेको बताउनु भयो । थिएटरका सचिव शिशिर चौलागाईले यो सहभागिता परिवर्तन थिएटरका लागि अन्तराष्ट्रिय मञ्चमा राम्रो प्रस्तुति गर्ने अवसरका रुपमा रहेको बताउनु भयो । एक सय दिन सञ्चालन हुने नाट्य महोत्सवमा हरेक दिन एउटा नाटक मञ्चन हुने र माघ २१ गते अर्थात फेब्रुअरी ३ तारिकका दिन परिवर्तन थिएटरले नाटक मञ्चन गर्ने अध्यक्ष नेपालले बताउनु भयो ।

नेपालबाट सहभागि हुने परिवर्तन थिएटरका लागि करीब एक लाख खर्च हुने अनुमान गरिएको अध्यक्ष नेपालले बताउनु भयो । ‘हामीलाई नाट्य महोत्सवमा सहभागि हुन करीब एक लाख खर्च लाग्ने रैछ,’ अध्यक्ष नेपालले भन्नुभयो, ‘थिएटर आर्थिक संकटमा छ, त्यसैले सहयोगीदाताहरुसंग अनुरोध गर्छौं ।’

विश्वका विभिन्न देशका नाट्यकर्मीहरुले नाटक मञ्चन गर्ने महोत्सव डिसेम्बर १८ देखि सूरु भएको छ भने मार्च २७ तारिकसम्म सञ्चालन हुनेछ । महोत्सवमा सहभागि हुन परिवर्तन थिएटरको कलाकारको समूह माघ १७ गते भारतको राजेस्थानतर्फ प्रस्थान गर्ने अध्यक्ष नेपालले बताउनु भयो ।

प्रकाशित मिति: बिहीबार, माघ १०, २०८१ १४:४०

प्रतिक्रिया दिनुहोस्