मेचीनगर,मसिंर २३ । प्रधानमन्त्री केपी शर्मा ओलीले मेचीनगर नगरपालिका–४ बाहुनडाँगीमा मानव सेवा आश्रम मेचीनगर सेवा केन्द्रको भवन उद्घाटन गर्नुभएको छ ।
दुइ दिने बसाईका लागि गृह जिल्ला झापा आउनुभएका प्रधानमन्त्री ओली चन्द्रगढी विमानस्थलबाट सिधै मेचीनगर ४ स्थीत मानव सेवा आश्रम पुग्नु भएको थियो । पत्नि राधिका शाक्य सहित आउनुभएका प्रधानमन्त्री ओलीले मानव सेवा आश्रम मेचीनगर सेवा केन्द्रको बहुबर्षिय गुरुयोजनाको समेत शिल्यान्यास गर्नु भएको छ ।
२२ करोडको लागतमा पाँच बर्षमा निर्माण सम्पन्न हुने गरी मानव सेवा आश्रमको महिला र पुरुषको फरक फरक ब्लक हुने गरी निर्माण हुने व्यवस्थीत भवन, सामुदायिक योग साधना केन्द्र र जेष्ठ नागरिक मनोरञ्जन केन्द्रलगायतका संरचना गुरुयोजना अन्तर्गत निर्माण हुने छ ।
कार्यक्रममा प्रधानमन्त्री ओलीले आश्रमको भवन निर्माणका लागि आफ्नो एक महिनाको तलब र प्रथम महिला शाक्यले दुई महिनाको पेन्सन रकम दिने घोषणा गर्नुभएको छ । त्यस्तै प्रधानमन्त्री ओलीले मञ्चबाटै चन्दाका लागि आह्वान गरेपछि झन्डै एक करोड बढी चन्दा दिने घोषणा भएको छ । कार्यक्रमकै बिच आश्रमका लागि दुई बिगाहा पाँच कठ्ठा जग्गा दिने स्थानीय रामबहादुर प्रधान र परिवारलाई सम्मान पनि गरिएको छ ।
भ्यू टावरको उद्घाटन :
आजै प्रधानमन्त्री ओलीले बहुचर्चित दमक बिजिनेस टावरको समेत उद्घाटन गर्नुभएको छ । दमक नगरपालिका–३ दापगाछीमा बनेको १८ तले भ्यू टावरको ओलीले आज उद्घाटन गर्नुभएको हो ।
आलोचना बढ्दै गएपछि भ्यू टावरलाई अहिले व्यवसायिक कम्प्लेक्स भनेर नामाकरण गरिएको छ । भ्यू टावरको लगानी एक अर्ब ४५ करोड रुपैयाँभन्दा धेरै रहेको छ । यो टावर चिनियाँ निर्माण कम्पनी जेडसिजीआइआइसी र आशिष ओम साइराम कम्पनीले संयुक्त रूपमा बनाएका हुन ।
भ्यू टावरको २०७६ को असार २७ गते प्रधानमन्त्री ओलीले नै शिलान्यास गर्नुभएको थियो । १८ तले भवन उपयोगविहिन छ, यो भवनलाई के प्रयोजनमा लगाउने भन्ने पनि अझै टुङ्गो लाग्न सकेको छैन ।गएको असारमा प्रधानमन्त्री नियुक्त भएपछि ओली पहिलोपटक गृहजिल्ला पुग्नुभएको छ ।
