मेचीनगर प्रमुख आचार्यलाई कोरोना संक्रमण

स्थानीय

गृहपृष्ठ
स्थानीय

मेचीनगर प्रमुख आचार्यलाई कोरोना संक्रमण

ज्ञानेन्द्र निरौला बुधबार, असोज २८, २०७७

काकरभिट्टा, असोज २८ ।
मेचीनगर नगरपालिकाका नगरप्रमुख बिमल आचार्यलाई कोरोना भाइरस कोभिड १९ को संक्रमण पुष्टी भएको छ ।
हिजो गरेको पिसिआर परीक्षणको आज आएको रिपोर्टमा आफुलाई कोरोना पोजेटिभ देखिएको नगरप्रमुख आचार्यले सेतोपत्रलाई बताउनु भयो ।

संक्रमण पुष्टी भए पछि सेतोपत्रसंग कुराकानी गर्दै नगरप्रमुख आचार्यले भन्नु भयो,‘मलाई संक्रमण भएको छ तर पनि मेरो अवस्था सामान्य छ । सामान्य ज्वोरो आए पछि केही दिन देखि नै सुरक्षीत भएर परिवारभन्दा अलग्गै बसेको छु ।’

कोरोनाको संक्रमणबाट नगरबासीलाई बचाउन कै लागि दिनरात काम गर्नेक्रममा नै आफुलाई संक्रमण भएको बताउँदै नगरप्रमुख आचार्यले दशैंको बेला आ आफ्नो घरमा नै बस्न समेत नगरबासीमा आग्रह समेत गर्नु भएको छ । नगरप्रमुख आचार्यले भन्नु भयो,‘यो बर्षको दशैंमा सामान्य सावधानी अपनाउन सकिएन भने दशैं होइन दशाको रुपमा आउँछ, त्यसैले सबैलाई सुरक्षीत रहन समेत आवहान गर्दछु ।’

नगर प्रमुख आचार्यले बिगत ७ दिन यता आफुसंग सम्पर्कमा रहेका सबैलाई होम क्वारेन्टाईनमा बस्न र लक्षण देखा परे पिसिआर परीक्षण गराउन समेत आग्रह गर्नु भएको छ ।
मेचीनगरमा आज नगरप्रमुख सहित एक स्वास्थ्यकर्मी र अन्य दुई गरी जम्मा ४ जनामा संक्रमण पुष्टी भएको छ । संक्रमित सबै होम आइशोलेशनमा रहेको समेत मेचीनगरले जनाएको छ ।

आज थपिएका ४ जना सहित मेचीनगरमा कोरोना संक्रमितको संख्या १८५ पुगेको छ । जसमध्ये १५६ जना संक्रमण मुक्त भएर घर फर्किएका छन भने २९ जना सक्रिय संक्रमित आइशोलेशनमा रहेका छन ।

प्रकाशित मिति: बुधबार, असोज २८, २०७७ १७:१७