झापा, जेठ १ । हात्तीपाईले रोगबिरुद्धको आम औषधि सेवन अभियानको अवधि थप गरिएको छ । बैशाख १६ देखि बैशाख ३० सम्म झापासहित सात वटा जिल्लामा हात्तीपाईले रोगबिरुद्धको आम औषधि सेवन अभियान संचालन भएको थियो । केही स्थानहरुमा अपेक्षित लक्ष्य हासिल हुन नसकेपछि थप १० दिनसम्म अभियान लम्ब्याइएको स्वास्थ्य सेवा विभागको इपिडिमियोलोजी तथा रोग नियन्त्रण महाशाखाले जनाएको छ । महाशाखाका निर्देशक डा रुद्रप्रसाद मरासिनीले परिपत्र जारी गर्दै यो अभियान बैशाख ३० गतेसम्म निर्धारण गरिएकोमा थप १० दिनसम्म संचालन गरिने जनाउनु भएको छ ।
उहाँले हालसम्मको प्रगति हेर्दा अधिकांश जिल्ला तथा स्थानीय तहहरुमा लक्षित जनसंख्याको उत्साहजनक सहभागिता रहेको भएता पनि केही स्थानहरुमा अपेक्षित लक्ष्य हासिल हुन नसकेको र केही व्यक्ति तथा समुदायले आफैँ पनि औषधि नखाने र छरछिमेक समुदायका अन्य व्यक्तिहरुलाई समेत भ्रामक सूचना दिई औषधि नखान उत्प्रेरित गर्ने क्रियाकलाप भइरहेको सूचना प्राप्त भएकोले यस्ता कार्य नगरिदिनु हुन र यस राष्ट्रिय अभियानमा सवैको सहभागिता तथा सहयोगका लागि अपिल समेत गर्नु भएको छ ।
यसैबिच झापामा आठ लाख चार हजार सात सय ३७ जनाले हात्तीपाइले रोगविरुद्धको औषधि सेवन गरेका छन । यही वैशाख १६ देखि ३० गतेसम्म भएको आम औषधि सेवन अभियानअन्तर्गत जिल्लाका १५ पालिकाका नागरिकलाई सो औषधि खुवाइएको जिल्ला स्वास्थ्य कार्यालय झापाले जनाएको छ ।
स्वास्थ्य कार्यालय झापाका निमित्त प्रमुख रमेश बाराकोटीका अनुसार बिर्तामोड नगरपालिकामा सबैभन्दा धेरै एक लाख २० हजार चार सय ४८ जनाले औषधि सेवन गरेका छन । सबैभन्दा न्यून भद्रपुर नगरपालिकामा ३२ हजार पाँच सय ४८ जनाले औषधि सेवन गरेको उहाँले जानकारी दिनुभयो ।
मेचीनगरमा ८१.१२, बुद्धशान्तिमा ९१, कनकाईमा ८५.१३, शिवसताक्षीमा ८८.२६, गौरीगञ्जमा ८६.५९, बाह्रदशीमा ८६.६२ तथा कचनकवलमा ८६.६३ प्रतिशतले औषधि सेवन गरेका स्वास्थ्य कार्यालयले जनाएको छ । यस्तै, अर्जुनधारामा ७४.४४ प्रतिशत, कमलमा ७१.३९, दमकमा ७२.९५, गौरादहमा ६६.९२, झापा गाउँपालिकामा ७६.६८, हल्दिबारीमा ७१.९७ र भद्रपुरमा ४५.७४ ले औषधि सेवन गरेको स्वास्थ्य कार्यालय झापाले जनाएको छ ।