झापा, असार २९ । नेपाली साहित्यका आदिकवि भानुभक्त आचार्यको २१० औँ जन्मजयन्ती आज देश तथा विदेशका विभिन्न स्थानमा समेत विविध कार्यक्रमको आयोजना गरी मनाइँदैछ ।
सरल नेपाली भाषामा लेखिएको अयोध्याका राजा रामको जीवनीलाई भावानुवादसहितको ‘रामायण’ प्रस्तुत गरेर भानुभक्तले नेपाली जनतालाई ठूलो गुन लगाउनु भएको थियो । वहाँले लेखेको रामायण अहिले पनि नेपालीको घर–घरमा लयसाथ पाठ गरिन्छ ।
पृथ्वीनारायण शाहले भौगोलिक रूपमा एकीकरण गरेको नेपाललाई आदिकवि भानुभक्तले भाषा, साहित्य र संस्कृतिमार्फत एकीकरण गर्नु भएको थियो ।
विसं १८७१ असार २९ गते तनहुँको चुँदीरम्घा गाउँमा जन्मिएका भानुभक्तलाई एक सामान्य घाँसीले ‘जन्मेपछि राम्रो काम गरेर नाम कमाउनुपर्छ’ भनी अर्ती उपदेश दिएकाले उनी रामायणलाई नेपालीमा रचना गर्न प्रेरित हुनुभएको थियो ।
‘वधुशिक्षा’ वहाँको अर्को प्रसिद्ध कृति हो । यसैगरी ‘प्रश्नोत्तर’, ‘भक्तमाला’, ‘रामगीता’, फुटकर रचनालगायत कृति छन्। कुमारी चोकको हिसाब मिलाउन नसकेर झ्यालखानामा परेका आदिकवि आचार्यले सरकारी कार्यालयमा हुने ढिलासुस्ती र ‘भोलिवाद’का कट्टर विरोधी भएर कवितामा भोलिको विरोध गर्दै लेख्नु भएको थियो, ‘भोलि भोलि भन्दैमा सब घर बिति गो बक्सियोस आज झोली ।’
नेपाली जातीय एकता, राष्ट्रिय पहिचान र नेपाली सांस्कृतिक चेतना जगाउन र राष्ट्रिय संस्कृतिलाई बलियो बनाउनमा भानुभक्तको ऐतिहासिक योगदान छ । भानुभक्त ऐतिहासिक व्यक्ति भएकाले सम्पूर्ण नेपालीले उनको सम्मान गर्नुपर्ने र उनका विचारका बारेमा उठेका विवादमाथि छलफल एवं समीक्षात्मक कार्यक्रम गर्नु आजको प्रमुख आवश्यकता भएको समालोचकहरूको धारणा छ । भानुको निधन विसं १९२५ असोजमा भएको थियो ।
भानुभक्तको जन्मजयन्तीको अवसरमा झापाको काकरभिट्टास्थीत भानु साहित्यीक प्रतिष्ठानले एउटा कार्यक्रम गरेर मनाउने तयारी गरेको छ । विभिन्न विधाका व्यक्तित्वलाई सम्मान सहितको कार्यक्रम आज विहान ११ बजे काकरभिट्टास्थीत खानेपानी संस्थाको सभाहलमा आयोजना गरिएको प्रतिष्ठानका कार्यवाहक अध्यक्ष डिल्लीराम घिमिरेले बताउनु भयो । त्यस्तै भानु जयन्तीका अवसरमा छिमेकी देश भारतको दार्जिलिङ, सिक्किम सहित भूटान र बर्मालगायत नेपाली भाषाभाषी धेरै रहेका देश एवं स्थानमा पनि विभिन्न कर्याक्रम गरेर मनाइदैंछ ।
