मेचीनगर, माघ २५ । झापाको मेचीनगरमा नकआउट फुटबल प्रतियोगिता आयोजना हुने भएको छ । नवज्योती युवा क्लब, मेचीनगर ३ बडाखालको आयोजनामा यही माघ २८ गतेबाट प्रतियोगिता आयोजना हुने भएको हो ।
क्लब ३० औँ बर्ष प्रवेश गरेको अवसरमा प्रतियोगिता आयोजना गर्न लागिएको क्लबका अध्यक्ष सुमन थापाले बताउनुभयो । उहाँका अनुसार प्रतियोगितामा १० टोलीको सहभागिता रहनेछ । जसमा आयोजकको २ वटा टोली, छिमेकी राष्ट्र भारतको दार्जिलीङबाट प्रकाश ११,इलामको जिर्मले फुटबल क्लब तथा न्यु स्टार क्लब ,बुद्धशान्ति रहेका छन ।
त्यस्तै शनिश्चरे फुटबल क्लब,बिर्तामोड फुटबल क्लब,ब्रर्दश युनाइटेड चन्द्रगढी ,न्यु स्टार क्लब खोपवाडी र रोलिङ क्लब धुलाबारीले प्रतियोगितामा सहभागिता जनाउने आयोजकले जनाएको छ ।
मेचीनगर ३ स्थित नवज्योती अधारभुत विद्यालयको प्रांगणमा हुने प्रतियोगिताको विजेता टोलीले नगद ८१ हजार र उपविजेता टोलीले ५१ हजार सहित ट्रफी, मेडल र प्रमाण पत्र प्राप्त गर्ने छ ।
२८ गतेबाट शुरु हुने प्रतियोगिताको फाइनल खेल भने फागुन ९ गते हुनेछ । उद्घाटन खेलमा इलामको जिर्मले फुटबल क्लब र आयोजक क्लबबिच प्रतिस्पर्धा हुने जनाइएको छ ।
