मेचीनगर, माघ १२ । झापाको मेचीनगर नगरपालिकाले नगर क्षेत्रमा हुने अवैध उत्खननमा कडाइ गर्न शुरु गरेको छ । बिषेश गरी नगर क्षेत्रका ढुङ्गा, गिट्टी, बालुवाको अबैद्य उत्खननमा कडाइ गरेको हो । नगरपालिकाले गत साउन महिना यता मेची, निन्दा र हडियाँ खोलाबाट अवैध रुपमा ढुङ्गा, गिट्टी, बालुवा उत्खनन गर्ने सवारी साधनलाई पक्राउ गरी धमाधम कार्वाही शुरु गरेको छ ।
नगरपालिकाले सात महिनाको अवधिमा मात्रै अवैध रुपमा ढुङ्गा, गिट्टी, बालुवा उत्खनन गरी ओसारपसार गर्ने सवारी साधानलाई नियन्त्रणमा लिइ २ लाख ६५ हजार राजस्व संकलन गर्न सफल भएको मेचीनगर राजस्व उपशाखाको तथ्यांकले देखाएको छ ।
तथ्यांक अनुसार नगरपालिकाले स्टक प्रमाणित नगरी मेची, निन्दा र हडियाँ खोलाबाट अवैध रुपमा ढुङ्गा, गिट्टी, बालुवा उत्खनन गर्ने सवारी साधनलाई पक्राउ गरी साउन महिनामा १५ हजार, भदौ महिनामा १५ हजार, कात्तिक महिनामा २५ हजार, पुस महिनामा ६० हजार र माघ १० गतेसम्म १ लाख ५० हजार राजस्व संकलन भएको छ ।
नगरपालिकाले नगर क्षेत्र भित्र पर्ने टिमाइ, हडिया, निन्दा र मेची नदिमा विगतदेखि नै आई ई.ई गरी मापदण्ड अनुसार ठेक्का लगाएर ढुंगा, गिट्टी र बलुवालगायतका नदिजन्य पदार्थहरू उत्खनन गर्दै आएकोमा त्यस विपरीत कार्य गर्नेलाई अहिले धमाधम कार्वाही गर्दै जरिवाना गर्न थालिएको नगरकार्यपालिका सदस्य एवम पूर्वाधार विकास समिति संयोजक चित्रकुमार धिमालले जानकारी दिनु भयो । वहाँका अनुसार अहिले नगरपालिकाले ट्रयाक्टर, टिपर र जेसिभीलगायतका सवारी साधानलाई नियन्त्रणमा लिएर जरिवाना तिराउने गरिएको छ ।
नगर क्षेत्रभित्र पर्ने टिमाइ, हडिया, निन्दा र मेची नदिमा आई ई.ई गरि ठेक्का प्रक्रिया अगाडी बढाई सकेको छ । जसमा मेची र हडिया खोलामा ठेक्का लागि सम्झौता हुन बाँकी रहेको छ । निन्दा र टिमाई खोलामा ठेक्काको प्रक्रिया अगाडी बढ्ने क्रममा रहेको नगरपालिका कार्यालयले जनाएको छ ।
