मेचीनगरका जनप्रतिनिधि र कर्मचारी ध्यानमा

स्थानीय

गृहपृष्ठ
स्थानीय

मेचीनगरका जनप्रतिनिधि र कर्मचारी ध्यानमा

सेतोपत्र डेस्क आइतबार, मंसिर २५, २०७९

तालिममा ध्यान गर्दै मेचीनगरका प्रमुख बुढाथोकी र उपप्रमुख उप्रेती ।

इटाभट्टा, मंसिर २५ । झापाको मेचीनगर नगरपालिकाका जनप्रतिनिधि र कर्मचारीहरुका लागि दुई दिने ध्यान तालिम हिजोबाट शुरु भएको छ । सामूहिक खुला मन सहयोग नाम दिइएको तालिमले तनाव व्यवस्थापन गर्न सहयोग पुग्ने नगरकी उपप्रमुख मिना उप्रेतीले बताउनु भयो ।

मेचीनगर नगरपालिकाको आयोजनामा ‘सभ्य समाजको पहिचान लैङ्गिक हिंसा विरूद्धको अभियान’ भन्ने मुख्य नारासहित जारी लैङ्गिक हिंसा विरूद्धको १६ दिने अभियानको अवसरमा तालीम आयोजना गरिएको नगरपालिका उपप्रमुख उप्रेतीले जानकारी दिनुभयो ।

सहभागीलाई शक्ति समुहका प्रशिक्षकहरू नर्वदा मगर र सम्झना प्रसाईँले तालिम प्रदान गर्दैहुनुहुन्छ । गैर सरकारी संस्था शक्ति समूह कार्यक्रमको सहआयोजक हो ।

प्रशिक्षक मगरले हरेक व्यक्तिले तनावलाई व्यवस्थापन गर्न सके विभिन्न रोगबाट मुक्ति हुने समेत बताउनु भयो । उहाँले तनाव कसरी व्यवस्थापन गर्न सकिन्छ र तनाव व्यवस्थापन स्वयम् आफैले मात्र गर्न सकिने जानकारी दिनुभयो । तनाव व्यवस्थापन गर्न कस्ता कस्ता विधि अवलम्बन गर्न सकिन्छ भनेर अभ्यास समेत गरिएको थियो ।

पहिलो दिनको तालिम निक्कै लाभदायक भएको नगरप्रमुख गोपालचन्द्र बुढाथोकीले प्रतिक्रिया दिनुभयो ।
नगरपालिकाको सभाहलमा सञ्चालन भएको ध्यान तालिममा मेचीनगरका प्रमुख, उपप्रमुख सहित कार्यपालिका सदस्यहरु, प्रमुख प्रशासकिय अधिकृत सहित अधिकृत कर्मचारी गरी ३५ जनाको सहभागिता रहेको नगरपालिकाले जनाएको छ ।

प्रकाशित मिति: आइतबार, मंसिर २५, २०७९ ०७:३२