झापा, चैत १८ । बिहिबार बिर्तामोडको एउटा पसलमा राजश्व अनुसन्धान कार्यालय इटहरीले सिल गरे पछि स्थानीय व्यवशायीहरुले गरेको असहयोगका कारण राजश्व कार्यालय थप आक्रामक भएको छ । बिर्तामोडको एउटा कपडा गोदाममा गएराति राजश्वले छापा मारेर गोदाम सिल गरेको छ ।
स्थानीयहरुले दिएको सुचनाको आधारमा बिर्तामोड नगरपालिका वडा नं. ३ स्थीत स्वागत चोकको दिपेन्द्र आचार्यको घरमा व्यवशायीले भाडामा सञ्चालन गरेको गोदाममा राजश्व कार्यालयले छापा मारेर सिल गरेको राजश्व अनुसन्धान कार्यालय इटहरीका प्रमुख तीर्थराज खनालले सेतोपत्रलाई जानकारी दिनु भयो ।
‘राजश्व अनुसन्धानको क्रममा बिर्तामोडका केही व्यवशायीहरुको कारोबार शंखास्पद देखिए पछि हामीले छापा मारेर गोदाम सिल गरेका छौं,’ प्रमुख खनालले भन्नुभयो, ‘हाम्रो काम नै अनुसन्धान गर्ने हो, अनुसन्धान प्रक्रियामा हामी कानूनले दिएको अधिकार प्रयोग गर्छौं ।’
‘बिर्तामोडका व्यवशायीहरुको दादागिरीका कारण आम मानिसले दुःख पाए तर हामीले अनुसन्धान प्रक्रियालाई जारी राखेका छौं,’ वहाँले सेतोपत्रसंगको कुराकानीमा भन्नुभयो, ‘दुई चार मान्छे उफ्रिदैंमा राज्यले आफ्नो नियमित काम गर्न छोड्दैन ।’
‘सहि ढंगले काम गरेका व्यवशायीले हामीसंग अप्ठ्यारो मान्नु पर्ने कुनै काम छैन,’ खनालले भन्नुभयो, ‘जसले गलत गर्छ उसैले अवरोध सृजना गर्ने हो । हामीले कानून अनुसारको अधिकार प्रयोग गरेर अनुसन्धानको काम गर्ने हो, हामी व्यवशायीले भने जसरी काम गर्न सक्दैनौं ।’
अनुसन्धान कार्यालयका प्रमुख खनालका अनुसार बिहिबार दिउँसो सिल गरिएको बिर्तामोडको शाह कपडा पसलको कानूनी कारबाहीको प्रक्रिया अगाडी बढेको छ भने मध्यराति छापा मारेर सिल गरिएको कपडा गोदाम आफ्नो हो भन्दै अहिलेसम्म कोही दाबी गर्न आएका छैनन ।
यस अघि बिहिबार राजश्व अनुसन्धान कार्यालय इटहरीको टोलीले बिर्तामोडको शाह कपडा पसलमा सिल गरे पछि त्यसको बिरुद्धमा विर्तामोड उद्योग वाणिज्य संघका पदाधिकारीहरु नै सडक बन्द गर्न सक्रिय भएका थिए । बिहिबार दिउँसो करीब तीन घण्टा बिर्तामोड तनावग्रस्त हुँदा हजारौं यात्रु र अन्य ब्यक्तिहरुले सास्ती व्यहोर्नु परेको थियो ।
