झापा, फागुन २० । पुर्वी नेपालकै सबैभन्दा लोकप्रीय फुटबल प्रतियोगिता झापा गोल्डकपको पाँचौं संस्करण शनिवार शुरु हुँदैछ । झापाको बिर्तामोडस्थीत डोमालाल रंगशालामा हुने प्रतियोगिताको सबै तयारी पुरा भएको आयोजकले बिहिबार पत्रकार सम्मेलनमार्फत जानकारी गराएको छ ।
कोरोना महामारीले दुई वर्ष रोकिएको मोफसलको प्रतिष्ठित झापा गोल्डकपको पाँचौं संस्करण फागुन २१ गतेदेखि ३० गतेसम्म हुदैछ । प्रतियोगितामा भारतको दार्जिलिङको एम एफसी र सिक्किमको आरपी एफसीकोसहित नेपालका त्रिभुवन आर्मी क्लब, नेपाल पुलिस क्लब, थ्री स्टर क्लब, संकटा क्बल, झापा–११ फुटबल क्बल, एपिएफ फुटबल क्बल, जावलाखेल युथ क्लब र सातदोबाटो युथ क्लबले प्रतिष्पर्धा गर्नेछन ।
झापा गोल्डकपको विजेताले १२ लाख ५५ हजार र उपविजेताले ६ लाख पाँच हजार रुपैयाँ नगद प्राप्त गर्ने झापा गोल्डकपका अध्यक्ष बिनोद बस्नेतले बताउनु भयो । प्रतियोगिताको ‘मस्ट भ्यालुएवल प्लेयर’ले एक थान मोटर साइकल पाउनेछ । यस्तै, उत्कृष्ट गोलकिपर, उत्कृष्ट डिफेन्डर, उत्कृष्ट मिडफिल्डर र उत्कृष्ट प्रशिक्षकलाई नगर २१ हजार रुपैयाँ दिइने अध्यक्ष बस्नेतले जानकारी दिनु भयो ।
प्रतियोगिताका लागि १० हजार दर्शक अँट्ने बाँसको प्यारापिट निर्माण, मैदान व्यवस्थापन लगायत प्रतियोगिताका लागि आवश्यक सम्पूर्ण तयारी पुरा भई सकेको जनाउदै अध्यक्ष बस्नेतले अब दर्शक र खेलाडीको मात्रै प्रतिक्षा रहेको पत्रकार सम्मेलनमा बताउनु भयो ।
प्रतियोगिता सम्पन्न गर्न एक करोड ४० लाख रूपैयाँ खर्च अनुमान गरिएको आयोजकले जनाएको छ । प्रतियोगिताको सर्वाधिक गोलकर्ताले नगद २५ हजार पाउनेछन । प्रत्येक खेलको म्यान अफ द म्याचलाई नगद नौ हजार ९९९ रुपैयाँ प्रदान गरिने आयोजकले जनाएको छ । पाँचौं संस्करणको यो गोल्डकपमा नेपाल आइस बियरले मुख्य प्रायोजन गरेको छ ।
पाँचौं संस्करणको गोल्डकपको उद्घाटन पूर्वप्रधानमन्त्री तथा एमाले अध्यक्ष केपी शर्मा ओली र समापन कांग्रेस नेता कृष्ण सिटौलाले गर्ने तय भइसकेको आयोजकले जनाएको छ ।
