काठमाण्डौ, भदौ ३१ । स्वास्थ्य तथा जनसंख्या मन्त्रालयले हतारमा विद्यालय सञ्चालन नगर्न निर्देशन दिएको छ । शिक्षा विज्ञान तथा प्रविधि मन्त्रालय, कोभिड–१९ संकट व्यवस्थापन केन्द्र र शिक्षा सरोकारवालासँग बुधबार स्वास्थ्य मन्त्रालयले गरेको छलफलमा हतारमा विद्यालय नखोल्न निर्देशन दिएको मन्त्रायलका प्रवक्ता डा कृष्णप्रसाद पौडेलले पत्रकारहरुलाई जानकारी दिनु भयो ।
विद्यालय खोल्ने वा नखोल्ने त्यहाँका रहेको स्थानीय तहले निर्धारण गर्ने प्रवक्ता पौडेलले बताउनु भयो । वहाँले विद्यालय खोल्नुभन्दा अगाडि नजिकैको स्वास्थ्य संस्था र स्थानीय निकायसँग समन्वय गर्नसमेत निर्देशन दिएको बताउनु भयो ।
स्थानीय तहमा रहेको कोभिड–१९ को जोखिम आँकलन गरी जिल्ला कोभिड–१९ संकट व्यवस्थापन केन्द्रको सिफारिसका आधारमा शिक्षा मन्त्रालयले जारी गरेको विद्यालय सञ्चालन सम्बन्धी कार्यढाँचा–२०७७ पालना गरी मात्र विद्यालय खोल्न भनिएको पौडेलले जानकारी दिनु भयो ।
शिक्षक, कर्मचारी र विद्यार्थीलाई कोभिड–१९ सँग आवश्यक अभिमुखीकरण गरी विद्यालय खोल्न निर्देशन दिएको छ । केही विद्यालयहरुले यही असोज १ गतेदेखि खोल्ने तयारी गरिरहेका छन । विद्यालय खोल्नु अघि ती ठाउँमा परीक्षण र उपचारको समुचित व्यवस्था मिलाउनु समेत भनिएको छ । विद्यालय खोल्नु अघि बालबालिकाको स्वास्थ्य र उपचार गर्नुपर्ने पौडेलले बताउनु भयो ।
वहाँले कोभिड–१९ को सङ्क्रमण घटे पनि जोखिम नघटेको बताउनु भयो । “सबै पालिकामा एउटै अवस्था छैन । सबै विद्यालयमा पनि एउटै अवस्था छैन”, वहाँले भन्नुभयो, “त्यसैले विद्यालयको अवस्था र स्वास्थ्यको मापदण्ड पालना गर्नसक्ने स्थिति हेरेर मात्र विद्यालय खोल्नुहोस ।”
छलफलमा स्वास्थ्यराज्यमन्त्री उमेश श्रेष्ठ, कोभिड–१९ संकट व्यवस्थापन केन्द्रका प्रमुख बालानन्द शर्मा, शिक्षा मन्त्रालयका सचिव रामप्रसाद थपलिया, निजी तथा आवासीय विद्यालय अर्गनाइजेशन नेपाल (प्याब्सन), नेपाल निजी तथा आवासीय विद्यालय अर्गनाइजेश, (एनप्याब्सन) र अभिभावक संघको सहभागिता थियो ।
हाम्राकुरा डटकमबाट ।
