काकरभिट्टा, साउन २९ ।।
समुदायमा कोरोना संक्रमण ह्वात्तै बढे पछि मेचीनगर नगरपालिका ७ दिनका लागि लकडाउन गरिएको छ ।
आज राति १२ बजेदेखि भदौ ३ गतेसम्म मेचीनगर नगरपालिकाको पुरै क्षेत्र कडा लकडाउन गर्ने मेचीनगर नगरपालिकाले निर्णय गरेको छ ।
नगरपालिकाको निर्णय अनुसार नगर भित्रका अत्यावश्यक सेवा वाहेकका सवै प्रकारका उद्योग, व्यवसाय, सेवा, शैक्षिक संस्था, कार्यालय, व्यापार, होटल, पसल र सपिङ मल वन्द गर्ने । त्यस्तै मेचीनगर भित्र अत्यावश्यक र मालवाहक वाहेकका सवै सवारी साधन संचालन नगर्ने निर्णय गरेको नगरप्रमुख बिमल आचार्यले बताउनु भयो ।
विशेष कार्यका लागि प्रयोग गरिने सवारी साधन नगरपालिकाले उपलब्ध गराएको पास लिएर मात्र चलाउन सकिने छ । वित्तिय संस्थाहरुको हकमा नेपाल सरकारले तोकेको मापदण्ड वमोजिम संचालन गर्न सकिने नगरपालिकाले निर्णय गरेको छ । धार्मिक, सांस्कृतिक र अन्य मृत्यु संस्कार लगायतका कार्यमा भिडभाड नगर्ने र मलामीमा अधिकतम २५ जनामात्र सहभागि हुन पाउने समेत नगरपालिकाले निर्णय गरेको छ ।
डेरी, खाद्यन्न तथा सागसब्जी पसल पूर्ण स्वास्थ्य सुरक्षण विधि अवलम्वन गरी विहान ८ः०० वजे देखि विहान १०ः०० वजेसम्म मात्र संचालन गर्ने नगरपालिकाले तय गरेको छ ।
अस्पताल र अन्य स्वास्थ्य सेवासँग सम्वन्धित क्षेत्रहरु पुर्ण स्वास्थ्य सुरक्षा बिधि अपनाएर नियमित रुपमा सञ्चालन गर्न सकिने नगरपालिकाले निर्णय गरेको छ ।
मेचीनगर नगरवासीहरु अत्यावश्यक काममा देखि वाहेक आ–आफ्नो घरभित्रै सुरक्षित रुपमा समेत नगरप्रमुख आचार्यले सबै नगरबासीलाई आग्रह गर्नु भएको छ । नगरप्रमुख आचार्यका अनुसार सामाजिक दुरी कायम गरी कृषि कार्य सकिने छ ।
