बिर्तामोड, फागुन ८ । झापाको विर्तामोडमा आयोजित एक कार्यक्रमका बीच एक पत्रकारसहित तीनजनालाई पुरस्कृत गरिएको छ ।
जयेन्द्रप्रसाद प्रसाई साहित्य सेवा कोषद्वारा आयोजित एक कार्यक्रमका बीच झापाली पत्रकार राधा खनाल धनमाया सक्रिय महिला पत्रकारिता पुरस्कारबाट पुरस्कृत हुनु भएको छ । भद्रपुर निवासी पत्रकार खनाल अन्नपूर्ण पोष्ट दैनिकका झापा सम्वाददाता हुनुहुन्छ । त्यस्तै २०७६ सालमा प्रकाशित कृतिमध्ये बर्ष उत्कृष्ट कृतिका रुपमा ‘अस्वत्थामा’ का लेखक कुमार भट्टराई पुरस्कृत हुनु भएको छ । झापा अर्जुनधारा निवासी लेकख भट्टराई झापाका सक्रिय पत्रकार तथा मेरो एफएम झापाका प्रबन्ध निर्देशक समेत हुनुहुन्छ । सोही कार्यक्रममा साहित्य तथा शिक्षा सेवी मोहन भण्डारी विष्णु चन्द्र पद्मा दीर्घ साहित्य सेवा पुरस्कारबाट पुरस्कृत गरिएको थियो । पुरस्कृत तीनै जनालाई दोसल्ला, सम्मान पत्र र जनही २१ हजार नगद सहित सम्मान गरिएको थियो ।
जयेन्द्रप्रसाद प्रसाई साहित्य सेवा कोषकै सभा कक्षमा आयोजित पुरस्कार बितरण कार्यक्रमका बिच पुरस्कृत तीनैजनालाई कार्यक्रमका प्रमुख आतिथि कोमलप्रसाद पोखरेल, संस्थाका अध्यक्ष गोपीकृष्ण प्रसाई, प्राज्ञसभा सदस्य सुभद्रा भट्टराई, केशवराज खनाल लगायतले दोसल्ला, सम्मानपत्रसहित नगद राशीद्वारा पुरस्कृत तथा सम्मान गर्नु भएको थियो । सम्मानित स्रष्टाको व्यक्तित्वबारे कोषका उपाध्यक्ष विष्णुकुमार भट्टराई र सदस्य रेजिना गौतमले प्रकाश पार्नुभएको थियो ।
कोषका अध्यक्ष गोपीकृष्ण प्रसाईको अध्यक्षतामा सम्पन्न कार्यक्रममा विष्णुकुमार भट्टराईद्वारा लिखित चिन्तन, मनन र गन्थन, बाँच्ने खेलका हारजित र विनोद खनालद्वारा लिखित ‘तितो–मिठो हास्यब्यङ्ग्य कृति विमोचन गरिएको थियो ।
विष्णुकुमार भट्टराईद्वारा लिखित कृतिमाथि पुण्यप्रसाद खरेल र हरिप्रसाद भट्टराईले समिक्षा गर्नुभएको थियो भने विनोद खनालद्वारा लिखित पुस्तकबारे स्रष्टा आफैंले प्रकाश पार्नुभएको थियो ।
संस्थाका सचिव राजेन्द्र प्रसाईद्वारा सञ्चालित कार्यक्रममा प्रमुख अतिथि पोखरेल, डा पुन्यप्रसाद सिग्देल, प्राज्ञसभा सदस्य भट्टराई, प्रसाई ट्रष्टका पूर्व अध्यक्ष खगेन्द्र प्रसाई पुरस्कृत ब्यक्तित्वहरु भट्टराई, भण्डारी र खनाल लगायतले शुभकामना मन्तव्य राख्नु भएको थियो ।
कार्यक्रममा दधिराज खनाल र मिना अधिकारीले कविता वाचन गर्नु भएको थियो ।
