सरकारले माघ १४ गते बिहिबार बिहान १० बजेदेखि कोरोना विरुद्धको खोप अभियान शुभारम्भ गर्दैछ । प्रधानमन्त्री केपी शर्मा ओलीले बालुवाटारबाट भर्चुअल रुपमा एकै पटक काठमाडौंका ११ वटा अस्पतालमा यो अभियान सुरु गर्नेछन् ।
प्रधानमन्त्रीबाट अभियानको शुभारम्भ हुँदै गर्दा ती ११ वटा अस्पतालले प्रत्यक्ष जोडिएर खोप लगाउन शुरु गर्ने स्वास्थ्य मन्त्रालयका कोभिडविरुद्धको इन्सिडेन्ट कमाण्ड सिस्टमका प्रमुख डा. गुणराज लोहनीले बताउनुभयो । उहाँका अनुसार पहिलो खोप लगाउने निर्णय गर्ने अधिकार हरेक अस्पताललाई दिइएको छ । शुक्रराजस्थित टेकु अस्पतालका निर्देशक डाक्टर सागरराज भण्डारीले टेकु अस्पतालको तर्फबाट पहिलो खोप लगाउने घोषणा गर्नुभएको छ भने दोस्रो नम्बरमा डाक्टर अनुप बास्तोलाले खोप लगाउनुहुने छ ।
प्रधानमन्त्रीले खोप अभियान शुरु गर्नु अघि राष्ट्रपति विद्यादेवी भण्डारीले पठाएको सन्देश पढिनेछ । स्वास्थ्य सेवा विभागका अनुसार पहिलो चरणमा ४ लाख ३० हजार फ्रन्टलाइनरले खोप लगाउन पाउनेछन् । खोप अभियानमामा सात प्रदेश र काठमाडौं उपत्यकाका गरी ६२ वटा अस्पताल र ७७ जिल्लाका ३०० भन्दा बढी केन्द्रबाट खोप अभियान सुरु हुनेछ । एउटा खोप बुथले एक दिनमा १ सय २० देखि १२५ जनालाई खोप दिनसक्ने स्वास्थ्य मन्त्रालयका प्रवक्ता डाक्टर जागेश्वर गौतमले बताउनुभयो ।
काठमाडौंमा शुक्रराज ट्रपिकल तथा सरुवा रोग अस्पताल, वीर अस्पताल, आयुर्वेद अनुसन्धान तथा तालिम केन्द्र अस्पताल, कीर्तिपुर, पाटन अस्पताल, परोपकार प्रसूति तथा स्त्री रोग अस्पताल, त्रिवि शिक्षण अस्पताल, महाराजगञ्ज, भक्तपुर अस्पतालमा खोप लगाइने छ । यस्तै शहीद धर्मभक्त अंग प्रत्यारोपण केन्द्र, काठमाडौं मेडिकल कलेज, जोरपाटी, सशस्त्र प्रहरी अस्पताल, बलम्बु, शहिद गंगालाल अस्पतालबाट पनि खोप लगाउन सकिन्छ ।
